युवकाचे तुकडे करून बोरवेल मध्ये टाकले!

पाचोड : गेल्या पाच महिन्यांपासून बेपत्ता असलेल्या एका पंचवीस वर्षीय तरुणाचा तुकडे केलेला मृतदेह कूपनलिकेत बुधवारी (दि. २८) सापडल्याने पाचोड परिसरात एकच खळबळ उडाली. पोलिसांनी तब्बल ३० फूट खड्डा खोदून मृतदेह कूपनलिकेतून बाहेर काढला. अनैतिक संबंधातून या युवकाची हत्या झाल्याचा संशय व्यक्त होत आहे..

मुजीम नबी शेख (२५ रा. खादगाव, ता. पैठण) असे खून करण्यात आलेल्या तरुणाचे नाव आहे. मुजीम हा अहमदनगर येथे लाईनवरील ट्रकवर कामाला होता. १० ऑक्टोबर २०१७ रोजी जेवण करून संध्याकाळी साडेसात वाजता तो घराबाहेर पडला. मात्र रात्री उशिरापर्यंत तो घरी न परतल्याने कुटुंबीयांनी त्याच्या मोबाईलवर संपर्क साधण्याचा प्रयत्न केला, मात्र त्याचा मोबाईल बंद होता. दुसऱ्या दिवशी कुटुंबीयांनी सर्वत्र शोध घेतला. गावातल्या मोहसीन शेखने मुजीमला रात्री गुड्डू उर्फ साहील अफसर शेख यांच्या पानटपरीवर बसलेला पाहिले होते. मुजीमचे पानटपरी चालक गुड्डूच्या पत्नीसोबत अनैतिक संबंध असल्याची चर्चा गावात होती. मुजीमच्या घरी सुद्धा याची भनक होती. त्यामुळे आपल्या लेकाचे बरेवाईट तर होऊ नये यासाठी मृत मुजीमच्या वडील नबीश शेख यांनी १२ ऑक्टोबर २०१७ रोची पोलीस ठाण्यात तक्रार दिली होती. यावेळी आपल्या मुलाला गुड्डू उर्फ साहील अफसर शेख, त्याचा भाऊ बाबर अफसर शेख व अकबर अफसर शेख यांनी डांबून ठेवल्याचा संशय व्यक्त केला होता..

यानंतर पाचोड पोलिसांनी या तिघांना ताब्यात घेऊन घटनेची माहिती काढण्याचा प्रयत्न केला होता. परंतु आरोपीने घटनेबाबत कबुली दिली नव्हती. तेव्हापासून पोलिसांनी या तिघांवर नजर ठेवण्यास सुरुवात केली होती. गुप्त माहितीद्वारे पोलिसांना गावातील जिल्हा परिषद शाळेच्या पाठीमागील बाजूस बबन डाके यांच्या शेतातील बोअरवेलमध्ये नजीमचा मृतदेह टाकल्याची माहिती मिळाली. सपोनि. महेश आंधळे, उपनिरीक्षक गोरक्ष खरड, नुसरत शेख, राठोड यांनी बुधवारी दुपारी घटनास्थळी जाऊन जेसीबी व पोकलेनच्या साहाय्याने तब्बल तीस फुटांपर्यंत खड्डा खोदला. यावेळी मुजीम पोलिसांना शरीराचे भागाचे अवशेष आढळले. पोलिसांनी सर्व तुकडे एकत्रित करून ते शवविच्छेदनासाठी पाचोड ग्रामीण रुग्णालयात पाठविले. रात्री उशिरापर्यंत गुन्हा दाखल करण्याची प्रक्रिया सुरू होती..